خضدار میں بھارتی حمایت یافتہ دہشتگردوں کا اسکول بس میں دھماکا، 3 بچوں سمیت 5 افراد شہید

Read Time:1 Minute, 53 Second

کوئٹہ: بلوچستان کے ضلع خضدار میں ایک اسکول بس کو دہشت گردانہ حملے کا نشانہ بنایا گیا جس کے نتیجے میں تین معصوم بچوں سمیت پانچ افراد شہید ہو گئے۔

آئی ایس پی آر نے اس بزدلانہ کارروائی کی شدید مذمت کرتے ہوئے کہا ہے کہ یہ حملہ بھارتی ریاستی دہشت گردی کی حمایت یافتہ دہشت گردوں کی طرف سے کیا گیا ہے۔

ترجمان آئی ایس پی آر کا کہنا ہے کہ خضدار میں اسکول جانے والے بچوں کی بس کو نشانہ بنایا گیا جو ایک المناک اور بزدلانہ اقدام ہے۔

آئی ایس پی آر نے مزید کہا کہ بھارت میدان جنگ میں شکست کھانے کے بعد ایسے گھناؤنے اور بزدلانہ واقعات کے پیچھے ہے، اور یہ حملے بھارت کے دہشت گرد نیٹ ورک نے اپنی پراکسی تنظیموں کے ذریعے کروائے ہیں۔

پاکستانی فورسز نے واقعے کی سختی سے مذمت کرتے ہوئے کہا ہے کہ دہشت گردی کے خلاف آپریشنز جاری رکھے جائیں گے اور ذمہ داروں کو قانون کے کٹہرے میں لایا جائے گا۔

وزیراعظم کی خضدار اسکول بس دھماکے کی شدید مذمت، ذمہ داران کو قرار واقعی سزا دینے کی ہدایت

وزیراعظم نے خضدار میں اسکول بس دھماکے کی سخت الفاظ میں مذمت کی ہے اور معصوم بچوں اور اساتذہ کی شہادت پر گہرا رنج و ملال کا اظہار کیا ہے۔ انہوں نے بچوں کے والدین کے ساتھ ہمدردی کا بھی اظہار کیا۔

وزیراعظم نے واقعے میں زخمی ہونے والوں کو فوری طبی امداد فراہم کرنے کی ہدایت دی ہے اور کہا ہے کہ ذمہ داران کا جلد از جلد تعین کرکے انہیں قرار واقعی سزا دی جائے۔

وزیراعظم نے واضح کیا کہ بھارتی سرپرستی میں دہشت گردوں نے یہ بزدلانہ حملہ کیا ہے، جو تعلیم دشمنی کا منہ بولتا ثبوت ہے۔ انہوں نے کہا کہ دہشت گردوں نے اسکول بس پر حملہ کرکے درندگی کی تمام حدیں پار کر دی ہیں۔

انہوں نے کہا کہ بھارتی سرپرستی میں پلنے والے دہشت گردوں کو انجام تک پہنچانا ہماری اولین ترجیح ہے اور دہشت گردوں کے ناپاک عزائم کو خاک میں ملانے کے لیے کوئی کسر نہیں چھوڑی جائے گی۔

وزیراعظم نے زور دیا کہ بچوں کو نشانہ بنانے والے دہشت گردوں کو کیفر کردار تک پہنچایا جائے گا تاکہ وہ اس سفاکی کا جواب دیں۔