یورپی یونین نے 150 ارب یورو کے نئے دفاعی فنڈ کی منظوری دے دی

Read Time:1 Minute, 51 Second

برسلز: یورپی یونین نے یورپ کے دفاعی نظام کو مضبوط بنانے کے لیے 150 ارب یورو کے قرضہ اسکیم (سیف) کی باضابطہ منظوری دے دی ہے۔ اس اسکیم کا مقصد یورپی ممالک کو دفاعی صلاحیتوں میں اضافہ کرنے اور امریکی سیکیورٹی انحصار میں کمی لانے کے لیے مالی وسائل فراہم کرنا ہے۔

یہ فیصلہ یورپی کمیشن کی جانب سے مارچ میں پیش کردہ تجویز کے بعد کیا گیا، جسے منگل کے روز برسلز میں ہونے والے اجلاس میں یورپی وزرائے کونسل نے منظور کیا۔ پولینڈ کی صدارت میں ہونے والے اس اجلاس میں 27 میں سے 26 رکن ممالک نے اس اسکیم کے حق میں ووٹ دیا، جبکہ صرف ایک ملک نے رائے شماری میں حصہ نہیں لیا۔

یہ فنڈ یورپی یونین کے مرکزی بجٹ سے حمایت یافتہ ہوگا اور اس کا مقصد یورپی دفاعی اخراجات میں فوری اور بڑے پیمانے پر اضافہ کرنا ہے۔ اگرچہ اسکیم کی تقسیم اور اس میں غیر یورپی سپلائرز کی شمولیت پر ابتدائی اختلافات پائے گئے، تاہم آخرکار یہ طے پایا کہ سیف فنڈ سے خریدے گئے اسلحے کی کل مالیت کا 35 فیصد تک حصہ یورپی یونین اور یوکرین سے باہر کے مینوفیکچررز سے بھی حاصل کیا جا سکے گا۔

فرانسیسی وزیر برائے یورپی امور، بنجمن حداد نے اس اقدام کو یورپ کے لیے ایک ”اہم سنگ میل“ قرار دیا۔ ان کا کہنا تھا, ’سیف پروگرام ایک بڑی پیش رفت ہے کیونکہ یہ یورپی صنعتوں کو ترجیح دینے، بیرونی انحصار (خصوصاً امریکہ پر) کم کرنے اور یورپ کی اسٹریٹجک خودمختاری کو مضبوط بنانے کا وعدہ کرتا ہے۔‘

انہوں نے مزید کہا کہ یہ پہلا قدم ہے حتمی نہیں، ’یہ صرف شروعات ہے، ہمیں اس سے بھی آگے جانا ہوگا۔‘

یہ اقدام یورپی یونین کے وسیع تر دفاعی اصلاحاتی منصوبے کا حصہ ہے، جس کے تحت نرم بجٹ قوانین کے ساتھ یہ قرضہ اسکیم مجموعی طور پر 800 ارب یورو تک کے دفاعی اخراجات کو ممکن بنا سکتی ہے۔

یہ منظوری ایسے وقت میں آئی ہے جب یورپی یونین اور برطانیہ کے درمیان دفاعی تعاون کا نیا معاہدہ بھی طے پایا ہے، جو بریگزٹ کے بعد تعلقات میں ایک نئے باب کا آغاز ہے۔ تاہم، برطانوی دفاعی کمپنیاں سیف اسکیم میں مکمل رسائی حاصل کرنے کے لیے یورپی یونین سے الگ معاہدہ کریں گی۔